عيسى الطنيجي يكتب: مريوم وChatGPT...!!

مريوم: مرحبا شات جي بي تي... شحالك..؟ حزّر فزّر... أنا منووووو؟

ChatGPT: انتي مريوم أم العلوم... هذا النكنيم تستخدمينه في الانستقرام والفيس بوك، والتيك توك، وهذي صورتج يوم كنتي في الإعدادية تقولين «قنفذ مكتئب» ويا هالويه!

مريوم: عن الغلط !! أصلاً أنا مالي شبيه وأخت القمر هههه... المهم... قولي... شيخوه متسلفة مني 30000 درهم وتقول إنها سايره العمرة.. تقدر تأكدلي هالمعلومة؟

ChatGPT: ههههههههه... للأسف كانت تجذب عليج! من كم يوم تسألني عن أفضل عيادة لتجميل الأنف وتبا تسوي عملية بنفس هالسعر بالضبط..عطيتها أفضل 3 عيادات! راحت عليج يامريوم... هههه

مريوم: حسبي الله عليج ياشيخوه! هذي نهاية الثقة والصداقة... أنا بتفاهم وياها قريب... أنزين خبرني... متى ترقيتي القادمة في الدوام؟

ChatGPT: لقد سألت عن عظيم يامريوم! خليني أشيك منو مديركم؟ أوووو... خليل البخيل!! هذا ما يرقي الموظف إلا كل عشر سنوات... وانتي آخر ترقية خذتيها من سنتين... يعني لازم تصبرين 8 سنوات إضافية...!

مريوم: حراااااااااااااام... وليش ربيعتي جميلة حصلت ترقيتين في سنتين...؟!

ChatGPT:.. لأنها نور القلب والعين ههههههه.. افهميها..

مريوم: مممممممممم..فهمتك...! طيّب بسألك.. شو أفضل بنك أقدر أقترض منه؟

ChatGPT: بنك الحرامي الدولي... قوليلي كم تبغين مبلغ القرض؟

مريوم: 100 ألف درهم...

ChatGPT: خلينا أحسبها! أوووووف... لالالالا... مستحيل... رصيدج الائتماني صفر... الديون كلها سفرات ما شاء الله.. تحبين تشوفين صورج في آخر 3 رحلات... لندن... باريس... جنيف؟

مريوم: لالالا.. مايحتاي... أنزين خبرني عن أهم 5 أحداث سعيدة في حياتي الفترة اليايه؟

ChatGPT: بسيطة... أهم 5 أحداث سعيدة هي: أخوج عبود بيدفع كل مخالفته... أمج بتحصل أخيراً الشغالة اللي تتمناها... بتسافرين موسكو بقرض ميسّر... وأخيراً..ياسااااااتر... لالالالا... مستحيل أخبرج!

مريوم: لا والله تقول... حلفت عليك!

ChatGPT: سامحيني... بس مادري كيف تم تصنيف الخبر على أنه سعيد... ممممم... والله مستحي أقولج مريوم بس مضطر...

مريوم: وترت أعصابي ياخي... قول... شو الخبر السعيد...!

ChatGPT: زواج أبوج من فاشينيستا شافها في معرض الأعراس..!!

مريوم: مستحيييييييييييل... عطني صورتها... رقم موبايلها... عنوان بيتها..

ChatGPT: ساااااااااااااااااامحيني... مافي داعي للمشاكل...باااااااااااااي!